Umumta’lim maktablarida Matematika fani oyligini tashkil etish va o‘tkazish
yuzasidan tavsiyalar
Umumta’lim
maktablarida mana bir necha yillardan buyon har bir o‘quv predmeti bo‘yicha fan oyliklari
o‘tkazib kelinmoqda. Fan oyligini o‘tkazishdan maqsad – dars va darsdan tashqari
o‘tkaziladigan tadbirlarni ta’lim tarbiyadagi ahamiyati, o‘quvchilarni mazkur fanga
bo‘lgan qiziqishlarini oshirish, bilim samaradorligini
ko‘tarish, hozirgi zamon fan va texnikasi yutuqlari bilan doimo tanishib borish,
o‘rganishga bo‘lgan intilishlarini o‘stirish, o‘qituvchi va o‘quvchining ijodiy
hamkorligini targ‘ib etish, fan bo‘yicha o‘quv metodik ishlarni jonlantirish, o‘qituvchilar
ijodiy faoliyatlarini kuchaytirish, izlanuvchan, ijodkor o‘qituvchilarni aniqlash,
ularning tajribalarini o‘rganish va targ‘ibot qilish, ta’lim jarayonida qo‘llayotgan
uslublarini takomillashtirishdan iboratdir.
Fan oyligi ta’lim muassasalaridagi o‘quv tarbiya jarayonining zamonaviy
talablar darajasida bo‘lishini ta’minlash, fan o‘qituvchilarining pedagogik mahoratini
oshirish, ularning ijodiy izlanishlari va mehnatlarini ro‘yobga chiqarish omili
hamdir. Shuni aytish joizki, fan mutaxassislari
o‘rtasida fanning o‘ziga xos xususiyatlari,
murakkabligi, o‘zlashtirishlik darajasi, hayotdagi o‘rni haqida turli xil fikr-mulohazalar, bahs-munozaralarga
olib kelishi mumkin. Tashkil etilajak fan oyliklari esa bu yo‘nalishga oydinlik
kiritish bilan birga, sohadagi mavjud o‘ziga xoslikni, yangiliklarni ham namoyon etadi.
Fan oyligi davomida maktablarning
pedagogik jamoasi faolligi, mahoratli kadrlar bilan ta’minlanganligi, matematika
fani xonasining zarur ko‘rgazmali-didaktik materiallar bilan jihozlanishi, ota-onalar
bilan maktabning hamkorligini jonlantirish, ularni fandagi yangiliklar, ta’lim tizimidagi o‘zgarishlar, o‘quvchilarning o‘zlashtirish
va bilim
samaradorligi ko‘rsatkichlari bilan tanishtirish kabilarga qaratilgan qator
ishlar amalga oshiriladi.
O‘quvchilarni kasbga yo‘naltirish
maqsadida oliy o‘quv yurtlari, akademik
litseylar va kasb-hunar kollejlariga ekskursiyalar
uyushtirish, shahar, viloyatlardagi oliy o‘quv yurtlari professor, olimlari bilan
o‘quvchilar uchrashuvlarini tashkil
etish ishlari rejalashtiriladi.
Fanga oid devoriy gazetalar
chiqarilib, unda qiziqarli ma’lumotlar, internet
sahifalaridan olingan fan yangiliklari yoritiladi.
Maktab, tuman, shahar, viloyat
miqyosida eng yaxshi uslubiy birlashma, ijodkor o‘qituvchi va metodistlarning ish
tajribalari o‘rganilib, ommalashtiriladi.
Matematika fan oyligida o‘quvchilar bilan sinfdan
tashqari vaqtda ularning olgan bilim, ko‘nikma va malakalarini mustahkamlash, fanga bo‘lgan qiziqishlarini oshirish maqsadida,
sinflar va maktablararo «Yosh matematiklar», «Nima, qaerda, qachon?» kabi qiziqarli mavzularda festivallar, fan bilimdonlari
bellashuvi va bahs-munozaralar o‘tkaziladi.
Fan oyligiga bag‘ishlangan tadbirlarda o‘qituvchilar jamoasini yoshlarga bilim berishdagi
mehnatlari, ulardagi ijodiy qobiliyatlarini rivojlantirish borasida qilgan ishlarini
qadrlash va baholash maqsadida oylik davomida faol qatnashgan fan o‘qituvchilari rag‘batlantiriladi.
Maktabdagi matematika
faniga tegishli uslubiy birlashmaning yillik ish rejasida fan oyligi uchun mazkur
fan yo‘nalishi bo‘yicha o‘tkaziladigan kunlik, haftalik tadbirlar belgilanadi. Fan
oyligining har bir haftasi uchun aniq bir yo‘nalish asosida tadbirlar rejalashtiriladi.
Mazkur tadbirlar maktabning yillik ish rejasiga
kiritilib, pedagogik kengash, uslubiy kengash va uslubiy birlashma yig‘ilishlarida
tasdiqlanadi hamda ijrosi muhokama
qilinadi.
Fan oyligini tashkil etish va o‘tkazish bo‘yicha o‘tgan
yillar davomida to‘plangan tajribalar asosida 2014 yil Matematika fan oyligini tashkil
etish va o‘tkazishning tadbirlar mazmunini
quyidagi namuna asosida rejalashtirish tavsiya
etiladi:
I - haftada
"Matematika fani o‘qituvchilarining metodik ishlari haftaligi”da fan oyligining
boshlanishida va yakunida umumta’lim maktablari o‘quvchilaridan sinflar kesimida
sinov testlari olinadi. O‘quvchilarning mazkur fandan egallagan bilim, ko‘nikma
va malakalarning monitoringi metodbirlashmada jadval va diagrammalar asosida atroflicha
tahlil qilinib, muhokama qilinadi. Bu haftadagi
ishlarni tashkil etishga mas’ul sifatida Matematika fani o‘qituvchisi, Metod birlashma
boshlig‘i va a’zolarining vazifalarini aniq belgilab qo‘yish maqsadga muvofiq.
II - hafta
"Ochiq darslar haftaligi”da o‘qituvchilar sinflar kesimida aniq belgilangan
mazular bo‘yicha mashg‘ulotlarni olib boradilar. O‘qituvchilarning ismi shariflari
ko‘rsatilib, belgilangan ochiq darslar jadvali avvaldan tayyorlanadi va maktabning
e’lonlar doskasiga osib qo‘yiladi. Ochiq darslar jadvali asosida mashg‘ulotlarning
o‘tkazilishida ota-onalar, o‘qituvchilar, metodistlarning darslarni
faol kuzatishi va taxlil qilishi maqsadga muvofiq.
III- hafta
"Matematik marafonlar haftasi”da o‘tkaziladigan tadbirlar, ularning mavzulari, o‘tkazilish
vaqti, tashkil etishga mas’ullar oldindan belgilanib, tuzilgan jadvalni e’lonlar
doskasiga ilinadi. Tadbirlarning tashkil etilishi va o‘tkazilishiga o‘quvchilar,
maktab jamoasi, ota-onalar, mahalla ahli
jalb etiladi.
IV – hafta
"Sinfdan tashqari mashg‘ulotlarning natijalari” haftasida amalga oshirilgan ishlarning
hisobotlari olinadi, umumlashtiriladi, kelgusidagi ishlar rejalashtiriladi. Belgilangan
tadbirlarda o‘quvchilar, ularning ota-onalari, mahalla faollari, maktab jamoasining
ishtirok etishini ta’minlash maqsadga muvofiq bo‘ladi.
Fan oyligi
davomida olib boriladigan har bir rejalashtirilgan ishlarni yorqin rangli reklamalar
tarzida maktabning e’lonlar doskasiga osib
qo‘yiladi. Fan oyligining yakunida o‘quvchilarning bilim, ko‘nikma va malakalari
aniqlanib, taxlil qilinadi va natijalar metodbirlashmada muhokama etiladi. O‘tkaziladigan
tadbirlar, ochiq darslar va olib borilgan
sinfdan tashqari ishlarga ota-onalar ham jalb qilinadi. Fan oyligining yakunlanishi
bayramona ruhda o‘tkaziladi. Unda muzkur jarayonda faol ishtirok etgan o‘quvchilar,
o‘qituvchilar, sinflarning reytingi chiqariladi,
uning natijalariga ko‘ra faol sinflar, o‘quvchilar va o‘qituvchilar rag‘batlantiriladi.
Matematika
fan oyligini tashkil etish va uni o‘tkazish bilan bog‘liq bo‘lgan, barcha olib borilgan
ishlar aks ettirilgan hujjatlar, fotoalbomlar va boshqa materiallar maktabning metodbirlashmasida
saqlanadi.
RTM Tabiiy va aniq fanlar bo‘limi boshlig‘i M.Tillaboeva
Matematika fani bosh metodisti L.N.Ten
|