Eng saralar navbatdagi turga o’tadi Umumta’lim muassasalarining eng ilg’or, izlanuvchan, tashabbuskor o’qituvchilarini aniqlash, ularning qobiliyati va mahoratini yuzaga chiqarish, samarali metodlarni ommalashtirish maqsadida tashkil etilgan “Yilning eng yaxshi fan o’qituvchisi – 2014” ko’rik-tanlovining respublika bosqichi boshlandi. Uning birinchi navbatda viloyatlarda g’oliblikni qo’lga kiritgan eng sara o’qituvchilar ona tili va adabiyot, ingliz tili, fransuz tili, davlat va huquq asoslari, jismoniy tarbiya, geografiya, boshlang’ich ta’lim, biologiya fanlaridan to’rt tur bo’yicha bahslarga kirishishdi. Birinchi (sirtqi) turga ko’ra ishtirokchilarning dars berish texnologiyasi aks ettirilgan 15 daqiqalik videodarsi baholandi. O’z fani bo’yicha belgilangan mavzu yuzasidan darsga tayyorgarlik ko’rishga bag’ishlangan 2-turda ishtirokchilarga 2 soat vaqt ajratildi. Ularning kompyuter texnikasi va qo’shimcha adabiyotlardan foydalanishi hakamlar tomonidan kuzatib borildi. 3-tur – “Ta’lim sifatini oshirishda amalga oshirmoqchi bo’lgan ishlarim” mavzusidagi taqdimot barcha ishtirokchilarga pedagogik tajribalari va kelgusidagi rejalari bilan hamkasblarini to’laqonli tanishtirish imkonini berdi. Ko’rik-tanlov shartiga ko’ra yuqoridagi bosqichlarda belgilangan balni to’plagan ishtirokchilar yakuniy turda o’zi yaratgan dars ishlanmasi asosida notanish sinfda dars o’tish huquqini qo’lga kiritadi. G’olib va sovrindorlarning nomi navbatdagi turdan keyin aniqlanadi.
manba: XTV sayti. |