2014 yil 19 fevral kuni O'zbekiston Respublikasi Prezidentining
"Sog'lom bola yili” Davlat dasturi to'g'risida”gi qarori qabul qilindi. Bu
haqida O'zA xabar bermoqda.
Xabarda ta'kidlanishicha, "dasturda avvalo ham jismoniy, ham ma'naviy jihatdan
sog'lom, mustaqil fikrlay oladigan, yuksak intellektual salohiyatli, chuqur
bilimli va zamonaviy dunyoqarashga ega, mamlakat taqdiri va kelajagi uchun
mas'uliyatni o'z zimmasiga olishga qodir barkamol avlodni shakllantirish,
davlat va jamiyatning barcha kuch va imkoniyatlarini ana shu maqsadlarga
safarbar etishga doir keng miqyosli chora-tadbirlarni amalga oshirish ko'zda
tutilgan”.
Dastur etti bo'lim va 125 banddan iborat bo'lib, unda bolalar tug'ilishi,
ta'lim-tarbiyasi, oilada sog'lom muhitni, uning iqtisodiy va ma'naviy-ahloqiy
asoslarini mustahkamlash, ijtimoiy soha rivojiga ajratilayotgan mablag'lar
samaradorligini oshirish bilan bog'liq barcha masalalar aks etgan.
Birinchi navbatda, sog'lom va barkamol avlodni tarbiyalash uchun qulay
tashkiliy-huquqiy sharoitlar yaratishga qaratilgan qonunchilik va
me'yoriy-huquqiy bazani yanada takomillashtirish, yangi qoida va me'yorlarni
ishlab chiqish bo'yicha chora-tadbirlar belgilangan. Sakkizta qonun loyihasini
ishlab chiqish rejalashtirilgan
Dastur
doirasida, xotin-qizlar, bolalar va o'smirlarning sifatli tibbiy xizmatlardan
foydalanish imkoniyatlarini yanada kengaytirish maqsadida har oyda
sog'lomlashtirish haftaliklari tashkil etiladi, shuningdek, mamlakatimiz
etakchi tibbiyot muassasalari mutaxassislari ishtirokida olis tumanlarda
yashovchi 145 ming nafar aholi chuqurlashtirilgan tibbiy ko'rikdan o'tkaziladi.
Mamlakatimizda 130 madaniyat va dam olish markazlarining moddiy-texnik bazasini
mustahkamlash, o'n beshta yangi madaniyat va istirohat bog'larini barpo etish,
mavjud yigirma to'qqiztasini rekonstruksiya qilish va ta'mirlash
rejalashtirilgan.
2014 yilda namunaviy loyihalar asosida 11 ming yakka tartibdagi uylar quriladi.
Respublika ixtisoslashgan pediatriya ilmiy-amaliy markazining qator
bo'linmalari, ToshPTI klinikalari, 13 viloyat ko'p tarmoqli bolalar tibbiy
markazlari, 62 tuman tibbiyot birlashmalari va boshqa tibbiy va tibbiy-ijtimoiy
muassasalar quriladi hamda tubdan ta'mirlanadi.Turli infeksiyalarga qarshi
yangi vaksinalarning bosqichma- bosqich joriy qilinishini hisobga olib,
bolalarni emlash dasturini takomillashtiriladi. Milliy emlash taqvimi asosida
kontingentning kamida 97 foizini qamrab olgan profilaktik vaksinasiya qilish
ko'lami kengaytiriladi.
Yil davomida maktabgacha ta'lim muassasalari tarbiyalanuvchilari va
o'quvchilarning 6,6 millionga yaqini chuqurlashtirilgan tibbiy ko'rikdan
o'tkaziladi.
Qishloqlarda yashaydigan
onalarning reproduktiv salomatligini mustahkamlash maqsadida 400 ming nafar homilador
ayol maxsus polivitaminlar bilan bepul ta'minlanadi.
"Barkamol avlod” bolalar markazlarini shakllantirish dasturining amalga
oshirilishi jarayonida 66 shunday markazlar tubdan ta'mirlanadi va jihozlanadi.
2014/2015 o'quv yilida 2,6 million o'quvchi 575 nomdagi 25 million nusxa
darsliklar va o'quv-uslubiy qo'llanmalar bilan ta'minlanadi.
Davlat dasturida 60,1 mingta o'quv o'ringa mo'ljallangan 380 umumta'lim
maktablarini rekonstruksiya qilish va ta'mirlash, ularni kompьyuter texnikasi, o'quv-laboratoriya
jihozlari va boshqa uskunalar bilan ta'minlash belgilangan.
Bundan tashqari, 161 kasb-hunar kolleji va akademik lisey, 48 bolalar musiqa va
san'at maktabi, 110 bolalar sport ob'ektlarini qurish, rekonstruksiya qilish va
tubdan ta'mirlash rejalashtirilgan.
586,9 ming nafar birinchi sinf o'quvchilariga o'quv jihozlari to'plamlari va
6,5 million nusxadagi darsliklar, umumta'lim maktablarining 500 mingdan ortiq
2-sinf o'quvchilariga chet tillar bo'yicha mulьtimediali ilovali darsliklar bepul beriladi.
Yozgi ta'til davrida bolalarning hordiq chiqarishi va bo'sh vaqtlarini mazmunli
o'tkazishini ta'minlash maqsadida sog'lomlashtirish oromgohlariga 280 ming
nafar o'g'il-qiz imtiyozli, 35,7 ming nafari bepul yo'llanmalar bilan
ta'minlanadi.
Davlat byudjeti mablag'lari hisobidan kam ta'minlangan oilalar farzandlariga
516,9 ming to'plamdagi qishki kiyim va 3,1 million nusxada darslik, o'quv
qurollari bepul beriladi.
2014 yil noyabrь oyida
Toshkentda «Bola uchun ijtimoiy sheriklik: milliy va xorijiy ilg'or tajriba»
mavzusida xalqaro forum o'tkaziladi.
Davlat dasturi doirasida amalga oshiriladigan tadbirlarga 4 509,2 milliard so'm
va 302,9 million dollar miqdorida mablag' yo'naltiriladi. |