Maktab o‘quvchilari orasidan eng iqtidorlilarini aniqlash va rag‘batlantirish maqsadida o‘tkazilayotgan bilimlar bellashuvining 3-bosqichi barcha viloyatlarda yuqori saviyada tashkil etildi. Yakkasaroy tumanidagi 144-umumta’lim maktabida mazkur bahsning Toshkent shahar bosqichi bo‘lib o‘tdi. — Joriy yilda Toshkent shahri bo‘yicha bilimlar bellashuvining maktab bosqichida 90279 nafar, 2-bosqichda esa 8368 nafar iqtidorli o‘g‘il-qiz kuch sinashdi, — deydi Toshkent shahar xalq ta’limi bosh boshqarmasi metodisti Gulchehra Mamanbaeva. — Tuman bosqichida 1-o‘rinni egallagan 510 nafar ishtirokchi shahar bosqichida bellashdi. Ulardan 101 nafari ixtisoslashtirilgan davlat umumta’lim maktablari o‘quvchilari. Bu ko‘rsatkich o‘tgan yilga qaraganda ancha yuqori. Bu esa o‘quvchilarning sinovlarga puxta tayyorgarlik ko‘rayotganidan dalolat bermoqda. Bellashuvning Toshkent viloyat bosqichi O‘rta Chirchiq tumanidagi 1-umumta’lim maktabida o‘tkazildi. O‘quvchilarning bilimlari yozma va amaliy ish hamda test savollari orqali sinovdan o‘tkazildi. Ta’kidlash lozimki, bilimlar bellashuvining saralash bosqichlarida o‘quvchilar o‘zlarining yuqori bilimga egaligini namoyish etishmoqda. Turli fanlardan o‘quvchilarning bilim ko‘rsatkichlari yildan-yilga ko‘tarilib borayotgani hakamlar hay’ati tomonidan alohida qayd etildi. — Ingliz tilidan tinglab tushunish shartida 5ta test savoliga javob berdik. Jarayonda talaffuzimdagi kamchiliklarni aniqlab, lug‘at bilan yanada ko‘proq ishlashim kerakligini tushundim, — deydi Oqqo‘rg‘on tumanidagi 8-maktab o‘quvchisi Sarvinoz Ahmatova. G‘olib o‘quvchilar bellashuvning respublika bosqichiga yo‘llanma oldi.
manba: Ma'rifat gazetasi. |